ಫಿರ್ಗಜೆಂತ್ ಭುರ‍್ಗ್ಯಾಂಚೊ ಆನಿ ಕ್ರಿಸ್ತಿ ಶಿಕ್ಷಣಾಚೊ ದೀಸ್ ಆಚರಣ್

ಆಮ್ಚ್ಯಾ  ಫಿರ್ಗಜೆಂತ್  ಭುರ‍್ಗ್ಯಾಂಚೊ ಆನಿ ಕ್ರಿಸ್ತಿ ಶಿಕ್ಷಣಾಚೊ ದೀಸ್ ನವೆಂಬರ್ 24, 2024 ತಾರಿಕೆರ್ ವ್ಹಡಾ ಸಂಭ್ರಮಾನ್ ಆಚರಣ್ ಕೆಲೊ. ಜಿವಿತಾಂತ್ಲಿ ಪಂಥ್ವಹಾನಾo ಫುಡ್ ಕರುನ್ ಬರ‍್ಯಾ ಪುಡಾರಕ್ ತಯಾರ್ ಜಾಂವ್ಚೆ ಹ್ಯಾ ವಿಶಯಾಚೆರ್ ಸಕಾಳಿಂ 8.೦೦ ವ್ಹರಾರ್ ಪಾಂಚ್ವಿ ಥಾವ್ನ್ ಧಾವಿ ಕ್ಲಾಸಿಚ್ಯಾ  ಭುರ‍್ಗ್ಯಾಂಕ್  ವಿಶೇಷ್ ಶಿಕೊವ್ಣ್ ಆಸ್‌ಲ್ಲಿ. ತ್ಯಾ ನಂತರ್ ಸರ್ವ್ ಭುರ‍್ಗ್ಯಾಂನಿ ಪವಿತ್ರ್ ಮಿಸಾಚ್ಯಾ ಬಲಿದಾನಾಂತ್ ಸಕ್ರೀಯ್ ರಿತಿನ್ ವಾಂಟೊ ಘೆತ್ಲೊ. ಭುರ‍್ಗ್ಯಾಂನಿ  ಲಿತುರ್ಜಿ ಚಲವ್ನ್ ವೆಲಿ. ಮಿಸಾಂ ಉಪ್ರಾಂತ್ ಪರತ್ ಪಾಂಚ್ವಿ ಥಾವ್ನ್ ಧಾವಿಂ ಕ್ಲಾಸಿಚ್ಯಾ ಭುರ‍್ಗ್ಯಾಂಕ್ ಹಿ ಶಿಕೊವ್ಣ್ ಮುಂದರ‍್ಸುನ್ ವೆಲಿ. ಉಪ್ರಾಂತ್ ಬೈಬಲ್ ಆನಿ ಸಾಮಾನ್ಯ್ ಜ್ಞಾನಚೆರ್ ಏಕ್ ಕ್ವಿಜ್ ಆಸಾ ಕೆಲ್ಲೆ. ಹ್ಯಾ ಕ್ವಿಜಾಕ್ ಭುರ‍್ಗ್ಯಾಂಕ್ 6 ಪಂಗ್ಡಾoನಿ ವಿಭಜನ್ ಕೆಲ್ಲೆ. ಹ್ಯಾ ಕಿಜಾಂತ್ ಭುರ‍್ಗ್ಯಾಂನಿ ಬೋವ್ ಅತುರಾಯೆನ್ ಆನಿ ಆಸಕ್ತೆನ್ ಪಾತ್ರ್ ಘೆತ್ಲೊ ಆನಿ ಸಂಪನ್ಮೂಲ್ ವ್ಯಕ್ತಿ ಥಾವ್ನ್ ಶಾಭಾಸ್ಕಿ ಆಪ್ಣಾಯ್ಲಿ. ಭುರ‍್ಗ್ಯಾಂಕ್ ಶಿಕೊವ್ಣ್ ದಿಂವ್ಕ್ ಬಾಪ್ ಡೊನಿ ಕಾರ್ಡೋಜ CSSR ಸಂಪನ್ಮೂಲ್ ವ್ಯಕ್ತಿ ಜಾವ್ನ್ ಹಾಜರ್ ಆಸ್‌ಲ್ಲೆ. 

ಹ್ಯಾಚ್ ವೆಳಾರ್ ಎಲ್.ಕೆ.ಜಿ. ಥಾವ್ನ್ ಚವ್ತ್ಯಾ ಕ್ಲಾಸಿಚ್ಯಾ ಭುರ‍್ಗ್ಯಾಂಕ್ ವಿವಿಧ್ ಚಟುವಟಿಕೊ ಆನಿ ಖೆಳ್ ಮಾಂಡುನ್ ಹಾಡ್ಲೆ. ನಾಚ್ ಆನಿ ಗಾಯಾನಾಂಚೆರ್ ಭುರ‍್ಗ್ಯಾಂಕ್ ತರ್ಬೆತಿ ದಿಲಿ೦.  ಹೆಂ ಚಟುವಟಿಕೊ ಆನಿ ತರ್ಬೆತಿ  ಕ್ರಿಸ್ತಿ ಶಿಕ್ಷಣ್ ಶಿಕೊಂವ್ಚ್ಯಾ ಶಿಕ್ಷಕಾಚಾ ಮುಖೇಲ್ಪಣಾಖಾಲ್ ಎಲ್ವಿನ್ ಡೇಸಾ, ಮೆಕ್ವಿನ್ ಡಿಸೋಜ, ವಿಯೊನ್ ಪಿಂಟೊ, ಪ್ರಿಸ್ಟನ್ ಲೋಬೊ, ಅನ್ಸಿಲ್ಲಾ ಫೆರ್ನಾಂಡಿಸ್ ಆನಿ ಜೋಶಲ್ ನಜ್ರೆತ್ ಹಾಂಚ್ಯಾ ಸಹಕಾರಾನ್ ಚಲ್ಲೆ. ಸರ್ವ್ ಭುರ‍್ಗ್ಯಾಂಕ್ ಉಗ್ಡಾಸಾಚಿ ಕಾಣಿಕ್ ದಿಲಿ ಆನಿ ಖೆಳಾಂತ್ ಜಿಕ್‌ಲ್ಲ್ಯಾ ಭುರ‍್ಗ್ಯಾಂಕ್ ಇನಾಮಾ ದೀವ್ನ್ ತಾಂಕಾ ಸಂತೊಸ್ಭರಿತ್ ಕೆಲೆ. 

ದನ್ಪರಾ ಜೆವ್ಣಾ ಉಪ್ರಾಂತ್ ಎಲ್.ಕೆ.ಜಿ. ಥಾವ್ನ್ ಧಾವಿ ಕ್ಲಾಸಿಚ್ಯಾ ಭುರ‍್ಗ್ಯಾಂ ಥಾವ್ನ್ ಧಾರ್ಮಿಕ್ ಆನಿ ಮೌಲ್ಯಾಂ ಆಧಾರಿತ್ ಅಪುರ್ಬಾಯೆಚೆಂ ಸಾಂಸ್ಕತಿಕ್ ಕಾರ‍್ಯೆಂ ಕ್ರಿಸ್ತಿ ಶಿಕ್ಷಣ್ ಶಿಕೊಂವ್ಚಾ ಶಿಕ್ಷಕಚಾ ಮುಖೇಲ್ಪಣಾಖಾಲ್ ಆಯೋಜನ್ ಕೆಲ್ಲೆ. ಹೆಂ ಕಾರ್ಯೆಂ ಹಾಜರ್ ಆಸ್‌ಲ್ಲ್ಯಾ ಸಮೇಸ್ತಾಂಚ್ಯಾ ಹೊಗ್ಳಿಕೆಕ್ ಪಾತ್ರ್ ಜಾಲೆಂ. ಹಾಚೆ ಉಪ್ರಾಂತ್ ವಿಗಾರ್ ಬಾಪಾಂಚೊ ಜಲ್ಮಾ ದೀಸ್  ಭುರ‍್ಗ್ಯಾಂನಿ ಆಚರಣ್ ಕೆಲೊ. ಫುಲಾಂ ತಶೆಂಚ್ ರಂಗಾಳ್  ಆನಿ ಸೊಭಿತ್ ಗ್ರಿಟೀಂಗ್ ಕಾರ್ಡಾ ತಯಾರ್ ಕರ್ನ್ ವಿಗಾರ್ ಬಾಪಾಂಕ್ ಜಲ್ಮಾ ದಿಸಾಚೆಂ ಶುಭಾಶಯ್ ಪಾಟಯ್ಲೆಂ. 

ವಿಗಾರಾನ್ ಆಪ್ಲೊ ಸಂದೇಶ್ ದೀವ್ನ್ ಭುರ‍್ಗ್ಯಾಂನಿ ಆಪ್ಲಿ ತಾಲೆಂತಾ ಧರ್ಣಿ ಪಂದಾ ಪೂರ್ನ್ ದವರಿನಾಸ್ತಾ ದೆವಾಚ್ಯಾ ಮಹಿಮೆಖಾತಿರ್ ಗಳ್ಸಿಜೆ ಮ್ಹಣ್ ಭುರ‍್ಗ್ಯಾಂಕ್ ಉತ್ತೇಜನ್ ದಿಲೆ. ಆನಿ ಸಗ್ಳ್ಯಾ ದಿಸಾಚ್ಯಾ ಕಾರ್ಯಾಂ ವಿಶ್ಯಾಂತ್ ಆನಿ ಭುರ‍್ಗ್ಯಾಂಚ್ಯಾ ಮೆತರ‍್ಪಣಾ ವಿಶ್ಯಾಂತ್ ಹೊಗ್ಳಿಕ್ ಉಚಾರ‍್ಲಿ ಆನಿ ಶಿಕ್ಷಕಾಂನಿ ದಿಂವ್ಚ್ಯಾ ಖಳ್ಮಿತ್ ನಾತ್‌ಲ್ಲ್ಯಾ ವಾವ್ರಾಕ್ ಶಾಭಾಸ್ಕಿ ಪಾಟಯ್ಲಿ. ಭುರ‍್ಗ್ಯಾಂಚೊ ದೀಸ್ ಆಚರಣ್ ಕರ‍್ಚ್ಯಾ ಬಾಬ್ತಿ ಭುರ‍್ಗ್ಯಾಂಕ್ ಆಸಾ ಕೆಲ್ಲ್ಯಾ ಖೆಳಾಂತ್ ವಿಜೇತ್ ಜಾಲ್ಲ್ಯಾ ಭುರ‍್ಗ್ಯಾಂಕ್ ಇನಾಮಾ ವಾಂಟ್ಲಿ.

ಶಿಕ್ಷಕಾಂನಿ ಸೊಭಿತ್ ಗೀತಾ ಸಂಗಿo ಹೆಂ ಕಾರ‍್ಯೆಂ ಆರಂಭ್ ಕೆಲೆ. ನಿಶೆಲ್ ಡಿಸೋಜ ಆನಿ ಅಶ್ವಿನ್ ಪುರ್ಟಾದೊನ್ ಕಾರ್ಯನಿರ್ವಹಣ್ ಕೆಲೆ. ಶರೊನ್ ಪಿಂಟೊನ್ ಸ್ವಾಗತ್ ಕೆಲೆಂ ಆನಿ ಅಲ್ರಿಷಾ ಡಾಯಸಾನ್ ಧಿನ್ವಾಸ್ ಪಾಟಯ್ಲೆ. ಮರ‍್ಯೆ ಮಾಯೆಚಿ ಸಸಾಯ್ ಮಾಗೊನ್ ಗೀತಾ ಸಂಗಿo ಕಾರ‍್ಯೆಂ ಸಂಪಯ್ಲೆo. ಸರ್ವ್ ಭುರ‍್ಗ್ಯಾಂಕ್ ಚೊಕ್ಲೆಟಾ ವಾಂಟ್ಲಿ ಆನಿ ಭುರ‍್ಗಿಂ ಸಂತೊಸಾನ್ ಆಪ್ಲ್ಯಾ ಘರಾ ಪಾಟಿಂ ಗೆಲಿ. 

ಭುರ‍್ಗ್ಯಾಂಕ್ ಕಾಫಿ ಫಳಾರ್, ಜೆವಾಣ್ ಆನಿ ಥಂಡ್ ಪೀವನಾಚಿ ವ್ಯವಸ್ಥಾ ಆಸಾ ಕೆಲ್ಲಿ.