ರುಜಾಯ್ ವಾಡ್ಯಾಗಾರಾಂಚೆ ವಾಡ್ಯಾ ಫೆಸ್ತ್ ಆಚರಣ್

ರುಜಾಯ್ ವಾಡ್ಯಾಗಾರಾಂನಿ ವಾಡ್ಯಾಚೆಂ ಫೆಸ್ತ್ ನವೆಂಬರಾಚಾ 10 ತಾರಿಕೆರ್ ಆಯ್ತಾರಾ ಸಕಾಳಿಂ ದೆವಾಕ್ ಅರ್ಗಾಂ ದಿವ್ನ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ಲಿತುರ್ಜಿ ಚಲವ್ನ್ ವೆಲಿ. ಉಪ್ರಾಂತ್  11.30  ವರಾರ್ ಮಾನೆಸ್ತ್ ಪೌಲ್ ಡಿಸಿಲ್ವಚಾ ಘರಾ ವಾಡ್ಯಾ ಫೆಸ್ತ್ ಸಂಭ್ರಮಾನ್ ಆಚರಣ್ ಕೆಲೆಂ. ಮಾಗ್ಣ್ಯಾದ್ವಾರಿಂ ಹೆಂ ಕಾರ‍್ಯೆಂ ಆರಂಭ್ ಜಾವ್ನ್  ವಿಗಾರ್ ಬಾಪ್ ಹೆರಾಲ್ಡ್ ಮಸ್ಕರೇನ್ಹಸಾಚಾ ಅಧ್ಯಕ್ಷ್ಪಣಾಖಾಲ್ ವೆದಿಂ ಕಾರ‍್ಯೆಂ ಆರಂಭ್ ಕೆಲೆಂ. ವಾಡ್ಯಾಚೊ  ಪ್ರತಿನಿದಿ ಜಾವ್ನ್ ಆಸ್ಚ್ಯಾ ಶ್ರೀ ವಿಕ್ರಾಂತ್ ಡಿಸಿಲ್ವನ್ ಹಾಜರ್ ಆಸ್‌ಲ್ಲ್ಯಾ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ. ವಾಡ್ಯಾಚಿ ಪ್ರತಿನಿಧಿ ಜಾವ್ನ್ ಆಸ್ಚ್ಯಾ ಶ್ರೀಮತಿ ಉಷಾ ಡಾಯಸಾನ್ ಸಭೆ ಮುಕಾರ್ ವಾರ್ಷಿಕ್ ವರ್ದಿ ಸಾದರ್ ಕೆಲಿ. ಸರ್ವ್ ವಾಡ್ಯಾಗಾರಾನಿಂ ಸಾಂಗಾತಾ ಮೆಳೊನ್ ಸಾಂಸ್ಕತಿಕ್ ಕಾರ‍್ಯೆಂ ಮಾಂಡುನ್ ಹಾಡ್‌ಲ್ಲೆಂ, “ಯೆಜ್ಮಾನ್ ಆನಿ ಚಾರ್ಲಿ” ಮ್ಹಳ್ಳ್ಯಾ ಹಾಸ್ಯಭರಿತ್ ನಾಟ್ಕುಳ್ಯೆಂ ಸವೆಂ ಪ್ರೇಕ್ಷಕಾಂಕ್ ಹಾಸಯ್ಲೆಂ. ಭುರ‍್ಗ್ಯಾಂನಿ  ಸಾಂಗಾತಾ ಮೆಳೊನ್ ಸೊಭಿತ್ ನಾಚ್ ಸಾದರ್ ಕೆಲೊ. ಖೆಳ್ ಖೆಳಾವ್ನ್ ಜಿಕ್ಲೆಲ್ಯಾಂಕ್ ಇನಾಮಾಂ ವಾಂಟ್ಲಿ. ವಿಗಾರ್ ಬಾಪಾಂನಿ ವಾಡ್ಯಾಗಾರಾಂಚೊ ಎಕ್ವಟ್ ವಾಖಣುನ್  ಬರೊ ಸಂದೇಶ್ ದಿಲೊ.  ಶ್ರೀ ಡೇವಿಡ್ ಡಾಯಸಾನ್ ಧನ್ಯವಾದ್ ಪಾಠಯ್ಲೆಂ. ಮಿಶೆಲ್ ಡಿಸಿಲ್ವನ್ ಕಾರ‍್ಯೆಂ ಚಲವ್ನ್ ವೆಲೆಂ. ಸರ್ವ್ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ರಾಂದ್‌ಲ್ಲೆ ರುಚಿಕ್ ಜೆವಾಣ್ ಜೆಂವ್ಚಾ ಸವೆಂ ಕಾರ‍್ಯೆಂ ಅಖೇರ್ ಜಾಲೆಂ.