ಅಕ್ಟೋಬರಾಚಾ 27 ತಾರಿಕೆರ್ ಆಯ್ತಾರಾ ಸಾಂಜೆರ್ ಮಾನೆಸ್ತ್ ವಿನ್ಸೆಂಟ್ ಪಿಂಟೊಚಾ ಘರಾ ಸಾಂ. ತೆರೆಜ್ ವಾಡ್ಯಾಗಾರಾಂನಿ  ಆಪ್ಲೆಂ ವಾಡ್ಯಾ ಫೆಸ್ತ್ ಸಂಭ್ರಮಾನ್ ಆಚರಣ್ ಕೆಲೆಂ. 6.30 ವರಾರ್ ಗುರ್ಕಾರ್ ಜೆಸಿಂತಾ ಡಿಸೋಜಚಾ ಮುಖೇಲ್ಪಣಾಖಾಲ್ ವಾಡ್ಯಾಗಾರಾಂ ಸಾಂಗಾತಾ ಪುಲಾo ಅರ್ಪುಂಚಾ ಸವೆಂ ಪವಿತ್ರ್ ಪುಸ್ತಕಾಕ್ ಮಾನ್ ಕರ್ನ್ ಕಾರ‍್ಯೆಂ ಸುರು ಕೆಲೆಂ. ವಾಡ್ಯಾಚ್ಯಾ ಭುರ‍್ಗ್ಯಾಂನಿ ಸೊಬಿತ್ ಪ್ರಾರ್ಥನಾಂ ನೃತ್ಯ ಸವೆಂ  ಸೊಮ್ಯಾಕ್ ಸ್ವಾಗತ್ ಕೆಲೊ. ಉಪ್ರಾಂತ್ ವಿಗಾರ್ ಬಾಪ್ ಹೆರಾಲ್ಡ್ ಮಸ್ಕರೇನ್ಹಸಾಚಾ ಅಧ್ಯಕ್ಷ್ ಪಣಾಖಾಲ್ ವೆದಿಂ ಕಾರ‍್ಯೆಂ ಪ್ರಾರಂಭ್ ಕೆಲೆಂ. ಜಮ್ಲೆಲ್ಯಾ ಸಮೇಸ್ತಾಂಕ್ ಗುರ್ಕಾರಾನ್ ಬರೊ ಯೆವ್ಕಾರ್ ಮಾಗ್ಲೊ. ವಾಡ್ಯಾಚಿ ಕಾರ‍್ಯದರ್ಶಿ ಶ್ರೀಮತಿ ಜೆಸಿಂತಾ ನಜ್ರೆತಾನ್ ವಾರ್ಷಿಕ್ ವರ್ದಿ ಸಾದರ್ ಕೆಲಿ. ವಾಡ್ಯಾ ಫೆಸ್ತಾ ಸಂದರ್ಭಿo ರುಪ್ಯೋತ್ಸವ್, ಮೊತಿಯಾಳೋತ್ಸವ್, ಮಾಣಿಕೋತ್ಸವ್ ಆನಿ ಭಾಂಗಾರೋತ್ಸವ್ ಆಚರಣ್ ಕೆಲ್ಲ್ಯಾ ಆಟ್ರಾಂ ಕಾಜಾರಿ ಜೊಡ್ಯಾಂಕ್ ಶಾಲ್ ಪಾಂಗ್ರಾವ್ನ್ ಉಡಾಸಾಚಿ ಕಾಣಿಕ್ ದೀವ್ನ್ ಉಲ್ಲಾಸಾಚೆಂ ಗೀತ್ ಗಾವ್ನ್ ಮಾನ್ ಕೆಲೊ. ಸರ್ವ್ ವಾಡ್ಯಾಗಾರಾನಿಂ ಸಾಂಗಾತಾ ಮೆಳೊನ್ ಸಾಂಸ್ಕತಿಕ್ ಕಾರ‍್ಯೆಂ ಮಾಂಡುನ್ ಹಾಡ್‌ಲ್ಲೆಂ, ಸ್ತಿಯಾಂನಿ ಸಾಂಗಾತಾ ಮೆಳೊನ್ ಉಲ್ಲಾಸಾಚೆಂ ಗೀತ್ ಗಾಯ್ಲೆಂ, ನೃತ್ಯ ಪ್ರದರ್ಶನ್ ಕೆಲೆಂ, ಆದಿಂ ಕಶೆಂ ಆಸ್‌ಲ್ಲೆಂ ಅತಾಂ ಕಶೆಂ ಆಸಾಂ, ಮುಖಾರ್ ಕಿತೆಂ ಘಡಾತ್ ಮ್ಹಳ್ಳ್ಯಾ ವಿಶಿಂ ಸೊಭಿತ್ ಕವಾಲಿ ದಾದ್ಲೆ, ಸ್ತಿಯೊ ಆನಿ  ಭುರ‍್ಗ್ಯಾಂನಿ ಮೆಳೊನ್ ನಟನ್ ಕೆಲಿ. “ಪೊಕ್ರಿ ಚೆರ್ಕೊ” ಮ್ಹಳ್ಳೊ ಹಾಸ್ಯಭರಿತ್ ನಾಟ್ಕುಳ್ಯೆಂ ಸವೆಂ ಪ್ರೇಕ್ಷಕಾಂಕ್ ಹಾಸಯ್ಲೆಂ. ದಾಕ್ಟುಲ್ಯಾ ಭುರ‍್ಗ್ಯಾಂಚೊ ನಾಚ್ ಸೊಭಿತ್ ಆಸ್‌ಲ್ಲೊ. ಯುವಜಣಾಂನಿ ಸಾಂಗಾತಾ ಮೆಳೊನ್ ಸೊಭಿತ್ ನಾಚ್ ಸಾದಾರ್ ಕೆಲೊ. ಸಬಾರ್ ಖೆಳ್ ಖೆಳಾವ್ನ್ ಜಿಕ್ಲೆಲ್ಯಾಂಕ್ ಇನಾಮಾಂ ವಾಂಟ್ಲಿ. ವಿಗಾರ್ ಬಾಪಾಂನಿ ಕಾರ‍್ಯವಿಶಿಂ ವಾಡ್ಯಾಗಾರಾಂಚಿ ಹೊಗ್ಳಿಕ್ ಉಚಾರ್ನ್ ಬರೊ ಸಂದೇಶ್ ದಿಲೊ.ಶ್ರೀಮತಿ ಲೂಸಿ ಲೋಬೊನ್ ಧನ್ಯವಾದ್ ಪಾಠಯ್ಲೆಂ. ಯುವಜಣಾಂನಿ ಕಾರ‍್ಯೆಂ ಚಲವ್ನ್ ವೆಲೆಂ. ಸರ್ವ್ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ರಾಂದ್‌ಲ್ಲೆ ರುಚಿಕ್ ಜೆವಾಣ್ ಜೆಂವ್ಚಾ ಸವೆಂ ಕಾರ‍್ಯೆಂ ಅಖೇರ್ ಜಾಲೆಂ.