ಜುಬ್ಲೆವ್ ವರ‍್ಸಾಚ್ಯಾ ಖುರ‍್ಸಾಚ್ಯಾ ಪಯ್ಣಾಚಿ ಸಂಪ್ಣಿಂ

ಜುಬ್ಲೆವ್ 2025 ವರ‍್ಸಾಚ್ಯಾ ಸುವಳ್ಯಾರ್ ಹರ್ಯೆಕ್  ವಾಡ್ಯಾಕ್ ತಶೆಂಚ್ ವಾಡ್ಯಾಚ್ಯಾ ಸರ್ವ್ ಕುಟ್ಮಾಂಕ್ ಖುರಿಸ್ ವರ್ನ್  ಖುರ‍್ಸಾಚೆಂ ಆರಾಧನ್  ಕರ್ನ್  ಭಾಗೆವಂತ್ ಖುರ‍್ಸಾಚಿಂ ಭೆಸಾಂವಾಂ ಮಾಗ್ಚ್ಯಾ ಉದ್ದೇಶಾನ್  05 ಎಪ್ರಿಲ್ 2025 ವೆರ್ ದಿಸಾ ಖುರಿಸ್ ಬೆಂಜಾರ್ ಕರ್ನ್  ತೊ ವಾಡ್ಯಾಕ್ ವ್ಹರ‍್ಚಾಕ್  ಆಯ್ತೊ ಕೆಲೊ. ತೊ ಪಯ್ಲೆಂ ಸಾಂ. ತೆರೆಜ್ ವಾಡ್ಯಾ ಥಾವ್ನ್ ಅರಂಭ್ ಕರ್ನ್ ಸರ್ವ್ ವಾಡ್ಯಾ ಕುಟ್ಮಾಂಕ್ ಪಯ್ಣ್ ಕರ್ನ್ ರುಜಾಯ್ ವಾಡ್ಯಾಂತ್ ಸಂಪಯ್ಲೊ. ರುಜಾಯ್  ವಾಡ್ಯಾ ಥಾವ್ನ್ 23 ನವೆಂಬರ್ 2025 ವೆರ್ ಸಕಾಳಿಂ 8.00 ವೊರಾಂಚ್ಯಾ ಮಿಸಾ ಪಯ್ಲೆಂ ಪುರ‍್ಶಂವಾರ್ ಗೀತಾ ಗಾವ್ನ್ ಇಗರ‍್ಜೆಕ್ ಪಾವಿತ್ ಕೆಲೊ. ವಿಗಾರ್ ಬಾಪಾನಿಂ ತೊ ಸ್ವೀಕಾರ್ ಕರ್ನ್ ಪುರ್ಶಂವಾರ್ ಹಾಡ್ನ್ ಆಲ್ತಾರಿರ್ ದವರ‍್ಲೊ. ಸಯ್ರೆಂ ಯಾಜಕ್ ಬಾಪ್ ಗಿಲ್ಬರ್ಟ್ ಡಿಸೋಜ ಹಾಜರ್ ಆಸೊನ್ ಮಿಸಾಚೆಂ ಬಲಿದಾನ್ ಭೆಟೊವ್ನ್ ಖುರ್ಸಾಚಾ ಜಯ್ತಾವಿಶಿಂ ಜೊಕ್ತೊ ಸಂದೇಶ್ ದಿಲೊ. ಮಿಸಾಚ್ಯಾ ಅಕ್ರೇಕ್ ವಿಗಾರ್ ಬಾಪಾನಿ ಖುರಿಸ್ ವಾಡ್ಯಾಂತ್ ಪಯ್ನ್ ಕರ್ತನಾ ಸಗ್ಳಿ ಮಾಂಡಾವಳ್ ಕೆಲ್ಲ್ಯಾ ವಾಡ್ಯಾ ಗುರ‍್ಕಾರಾಂಚೊ, ಪ್ರತಿನಿಧಿ ತಶೆಂಚ್ ಸರ್ವ್ ಕುಟ್ಮಾಂಚೊ ಉಪ್ಕಾರ್ ಬಾವುಡ್ಲೊ ಆನಿ ಖುರ‍್ಸಾಚೆಂ ಭಕ್ತಿಪಣ್ ಕುಟ್ಮಾಂತ್ ಸದಾಂಚ್ ಜಿವಾಳ್ ದವರುಂಕ್ ಉಲೊ ದಿಲೊ. ಅಶೆಂ ಫಿರ್ಗಜೆಂತ್ ಖುರ‍್ಸಾಚೆಂ ಪಯ್ಣ್ ಯಶಸ್ವೆನ್ ಆನಿ ಬೆಸಾಂವಾಂ ಬರಿತ್ ಜಾವ್ನ್ ಸಂಪ್ಲೆಂ.