ಸಾಂ ವಿಶೆಂತ್ ಪಾವ್ಲ್ ಸಭೆಚೆಂ ಫೆಸ್ತ್ 

27 ಸೆಪ್ಟೆಂಬರ್ 2026 - ಸಾಂ ವಿಶೆಂತ್ ಪಾವ್ಲ್ ಸಭಾ (ಎಸ್.ವಿ.ಪಿ.) ಶಿರ್ತಾಡಿ ಸಮ್ಮೇಳನಾನ್ ತಾಂಚ್ಯಾ ಪಾತ್ರೊನ್ ಸಾಂ ವಿಶೆಂತ್ ಪಾವ್ಲಾಚೆಂ ಫೆಸ್ತ್ ಆಯ್ತಾರಾ, 27 ಸೆಪ್ಟೆಂಬರ್ 2026 ವೆರ್ ಆಚರಣ್ ಕೆಲೆಂ.

 ಸಕಾಳಿಂ 8:00 ವರಾರ್  ಪವಿತ್ರ್ ಮಿಸಾಚ್ಯಾ ಬಲಿದಾನಾ ಸವೆಂ ಆಚರಣ್ ಸುರು ಕೆಲೆಂ. ಮಾ| ಬಾಪ್ ರೋಶನ್ ರೊಜಾರಿಯೊ OFM ಹಾಣಿ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಎಸ್.ವಿ.ಪಿ. ಸಮ್ಮೇಳನಾಚಾ ಸಾಂದ್ಯಾನಿ ಭಕ್ತಿಪಣಾನ್ ಲಿತುರ್ಜಿ ಚಲವ್ನ್ ವೆಲಿ. ಸಾಂ ವಿಶೆಂತ್ ಪಾವ್ಲ್ ಸಭೆಚೊ ಕಾರ್ಯದರ್ಶಿ ಭಾವ್ ಲುವಿಸ್ ಸಾಂತ್ಮಾಯೋರಾನ್ ಪ್ರಸ್ತುತ್ ವರ್ಸಾಚಿ ವರ್ದಿ ವಾಚ್ಲಿ.

 ಮಿಸಾ ಉಪ್ರಾಂತ್ ಕಾರ್ಮೆಲ್ ಗಾರ್ಡನಾಂತ್ ಸಹಮಿಲನ್ ಕಾರ್ಯೆಂ ಚಲ್ಲೆಂ. ದೆವಾಚೆಂ ಆಶೀರ್ವಾದ್ ಮಾಗೊನ್ ಕಾರ್ಯೆಂ ಸುರು ಜಾಲೆಂ. ಮಾ| ಬಾಪ್ ರೋಶನ್ ರೊಜಾರಿಯೊ OFM ಹಾಂಚ್ಯಾ ಉಪಸ್ಥಿತಿಂತ್ ಎಸ್.ವಿ.ಪಿ. ಸಾಂದ್ಯಾನಿ ಆಪ್ಲಿ ಭಾಸಾವ್ಣಿ ನವ್ಯಾನ್ ಕೆಲಿ.

 ವೆದಿರ್ ಸಯ್ರೆ ಜಾವ್ನ್, ಮಾ| ಬಾಪ್ ರೋಶನ್ ರೊಜಾರಿಯೊ OFM, ಸಾಂ ವಿಶೆಂತ್ ಪಾವ್ಲ್ ಸಭೆಚೊ ಅಧ್ಯಕ್ಷ್ ಭಾವ್ ಚಾರ್ಲ್ಸ್ ಸಾಂತ್ಮಾಯೋರ್, ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಶ್ರೀ ಆಸ್ಟಿನ್ ಡೇಸಾ, ಕಾರ್ಯದರ್ಶಿ ಶ್ರೀಮತಿ ಸಿಲ್ವಿಯಾ ಡೇಸಾ ಆನಿ ಫಿರ್ಗಜ್ ಗೊವ್ಳಿಕ್ ಆಯೋಗಾಂಚೊ ಸಂಯೋಜಕ್ ಭಾವ್ ವಿಲ್ಫ್ರೆಡ್ ಪಿಂಟೊ ಹಾಜರ್ ಆಸ್ ಲ್ಲೆ.

 ಅಪ್ಲ್ಯಾ ಸಂದೇಶಾಂತ್, ಮಾ| ಬಾಪ್ ರೋಶನ್ ರೊಜಾರಿಯೊ ಹಾಣಿ, ಫಿರ್ಗಜೆಂತ್ ಎಸ್.ವಿ.ಪಿ. ಸಭೆಚಾ ಮಹತ್ವಾಚ್ಯಾ ಪಾತ್ರಾ ವಿಶಿಂ ಸಾಂಗ್ಲೆಂ. ಎಸ್.ವಿ.ಪಿ. ಸಭೆಚಾ ಮಿಸಾಂವಾ ಸೆವೆಕ್ ಆಧಾರ್ ದಿಂವ್ಕ್ ಆನಿ ಸಭೆಚ್ಯಾ ಸಾಂದೆ ಜಾವ್ನ್ ವಾವ್ರುಂಕ್ ತಾಣಿ ಉಲೊ ದಿಲೊ. ಗರಿಬಾಂ ಆನಿ ಗರ್ಜೆವಂತಾಂಕ್ ದಯಾ ಆನಿ ನಿಸ್ವಾರ್ಥ್ ಸೆವಾ ದೀವ್ನ್ ಪ್ರಸಿದ್ಧ್ ಜಾಲ್ಲ್ಯಾ ತಾಂಚ್ಯಾ ಪಾತ್ರೊನ್ ಸಾಂ ವಿಶೆಂತ್ ಪಾವ್ಲಾಚೊ ದಾಖ್ಲೊ ದೀವ್ನ್, ದೆವಾಚ್ಯಾ ಮೊಗಾ, ದಯಾಮಯಾ ಆನಿ ಕಾಕುಳ್ತಿಚ್ಯಾ ಮಿಷನಾಚೆಂ ಕಾಮ್ ಮ್ಹಣುನ್ ಹಿ ಸೆವಾ ಭೆಟೊಂವ್ಚ್ಯಾ ಸರ್ವ್ ಸಾಂದ್ಯಾಂಚೊ  ಉಪ್ಕಾರ್ ಆಟಯ್ಲೊ.

 ಶ್ರೀ ಆಸ್ಟಿನ್ ಡೇಸಾನ್ ಫಿರ್ಗಜೆಂತ್ ಎಸ್.ವಿ.ಪಿ. ಸಭೆನ್ ಹಾತಿಂ ಘೆತ್ಲಲ್ಯಾ ಕಾರ್ಯಾ ವಿಶಿಂ ಉಲವ್ನ್, ಪಾತ್ರೊನ್ ಫೆಸ್ತಾಚಿ ಶುಭಾಶಯ್ ದಿಲಿಂ. ಕಾರ್ಯಕ್ರಮಚೊ ಭಾಗ್ ಜಾವ್ನ್ ಆಧಾರಿತ್ ಕುಟ್ಮಾಂಕ್ ಉಗ್ಡಾಸಾಚ್ಯೊ ಕಾಣಿಕ್ ದಿಲ್ಯೊ.

 ಭಯ್ಣ್ ನ್ಯಾನ್ಸಿ ಮಾರ್ಟಿಸ್ ಹಿಣೆಂ ಸರ್ವಾಂಕ್ ಸ್ವಾಗತ್ ಕೆಲೊ. ಭಾವ್ ಜೋಸೆಫ್ ಪಿರೇರಾ ಹಾಣಿ ಸರ್ವಾಂಚೊ  ಉಪ್ಕಾರ್ ಆಟಯ್ಲೊ. ವಾಡ್ಯಾಚೆಂ ಗುರ್ಕಾರ್, ಫಿರ್ಗಜ್ ಗಾರ್, 15 ವೈಶಂತಿಕ್ ಭಾವಾಂಭಯ್ಣಿಂ ಆನಿ ಅಶೆಂ ಲಗ್ಬಗ್ 50 ಜಣ್ ಹ್ಯಾ ಕಾರ್ಯಾಕ್ ಹಾಜರ್ ಆಸ್ ಲ್ಲೆ. 

 ಎಸ್.ವಿ.ಪಿ. ಸಾಂದ್ಯಾನಿ ತಾಂಚ್ಯಾ ಪಾತ್ರೊನಾಕ್ ಸಮರ್ಪಿಲ್ಲೆಂ ಗೀತ್ ಗಾವ್ನ್  ಕಾರ‍್ಯೆಂ  ಅಕೇರ್ ಕೆಲೆಂ.